සිනමාවේදී සිරිමල් විජේසිංහඅනුරාධපුරයේදී
නිදහසේ වේදිකාව තුළ කලාකරුවෙකු වශයෙන් අදහස් දැක්වීමට විතරක් නෙවෙයි පුරවැසියෙක් වශයෙන් මට තියෙන ප‍්‍රශ්නය මොකක්ද කියල ප‍්‍රකාශ කිරීමේ අවස්ථාවත් ලැබිල තියෙනවා. මේ වේදිකාවේ නොයෙක් විට කියැවෙනවා තියෙන භීෂණය ගැන. කලාවට, සංස්කෘතියට හෝ මාධ්‍ය නිදහසට තියන ප‍්‍රශ්න ගැන. මම අහන්න කැමතියි මේ මාධ්‍ය හෝ කලා නිදහස විනාශ වීමට වගකිව යුතු වැරදිකාරයා කවුද කියල. වැරදිකාරයා මහින්ද සහ ගෝඨාභය සහෝදරවරු දෙන්නා විතරක්ද? මම දකින විදියට අද මෙතන ඉන්න විපක්ෂයේ සාමාජිකයන් ඇතුළු ඔබ සියළුදෙනාම එහි කොටස්කාරයින්.
ඒ ඇයි? පසුගිය කාලය පුරාම අතිශය බිහිසුණු යුද්ධයක් මේ රටේ තිබුණා. දැන් ඒ යුද්ධය ඉවරයි. නමුත් තාමත් නොනිල වශයෙන් යුද මානසිකත්වය ක‍්‍රියාත්මක වෙන පශ්චාත් යුද කාලයක් පවතිනවා. ඒ නිසා යුද භීෂණය ක‍්‍රියාත්මක වෙනවා. එතකොට යුද්ධයට වැරදිකාරයා අද ඉන්න ආණ්ඩුව පමණක්ද? කලාකාරුවෙක් වශයෙන් මම නම් යුද්ධයට සපෝට් කළේ නැහැ. ඒ නිසා මට චෝදනා කරන්න ලේසියි. ඔබ සියළුදෙනාම පක්ෂ භේදයකින් තොරව යුද්ධයට සපෝට් කළා. ඒ නිසා කලාකරුවෙක් විදිහට අද මට ඇති වෙලා තියෙන තත්ත්වයට සහ කලාව පිළිබඳ මේ පවතින කලහකාරී වාතාවරණයට ඔබ චූදිතයෙක් කියලා මම සෘජුවම කියනවා.
දැන් ඔබ අහන්න පුළුවන් එහෙමනම් කොහොමද ත‍්‍රස්තවාදීන් නැති කරන්නේ කියලා. මම විශ්වාස කරනවා අතිශය රුදුරු ත‍්‍රස්තවාදී ප‍්‍රශ්නයක් මේ රටේ තිබුණා, ඒක ඇත්ත. නමුත් දරුණු ත‍්‍රස්තවාදයක් මර්දනය කරන්න ඊට වඩා ත‍්‍රස්තවාදයක් යොදා ගත්තා. අපිට තිබුණ හොඳම විසඳුම් වෙනුවට ලේසිම විසඳුම තෝරා ගත්තා. අද නොනිල වාරණ රාශියක් ඇතිවෙලා. පහුගිය කාලයේ මාධ්‍ය නිදහස නැහැ කියලා උද්ඝෝෂණය කරපු මාධ්‍යවේදීන් කිව්වෙ නැහැ මාධ්‍ය නිදහස නැතිවෙලා තියෙන්නෙ යුද්ධය නිසා කියලා.කලාකරුවෙක් වශයෙන් මට කියන්න තියෙන්නෙ මට කෙළවුණේ යුද්ධය නිසා කියලයි. අපි කවුරුත් තේරුම් ගත්තෙ නැහැ ඇයි ත‍්‍රස්තවාදය ඇති වුණේ කියල. හෙට අනිද්දා වෙද්දී මේ රටේ තව ත‍්‍රස්තවාදීන් ඇති වෙන්න පුළුවන්. ඒව තේරුම් ගත්තොත් අපි වැටිලා ඉන්න වලෙන් ගොඩ එන්න පුළුවන්.
Back to platform
Back to samabima
No comments:
Post a Comment