වික‍්‍රමබාහු - සිරිතුංග ප‍්‍රජාතන්ත‍්‍රවාදයට ශක්තියක්, අපි ඔවුන්ට සුභ පතනවා
මාතර නිදහසේ වේදිකාවේදී රනිල් කියයි
මේ නිදහසේ වේදිකාව අපි ආරම්භ කළේ ලසන්ත වික‍්‍රමතුංග මහතා ඝාතනය කලායින් පස්සේ සියළු දෙනාටම ශක්තියක් ලබා දීමටයි. මේ සඳහා දේශපාලන සංවිධාන, සිවිල් සංවිධාන, ජන මාධ්‍ය අපි ඔක්කොම එකට එකතු වුණා. අපි බය නැතුව මේ ව්‍යාපාරය ඉදිරියට ගෙන ගියා. දැන් රජතුමා කියනවා එයා රටේ භාරකාරයා ලූ. දැන් රජතුමා කියනවා යුද්ධෙ කරපු නිසා ව්‍යවස්ථාදායක සභාව පත් කරන්න බැරි වුණා කියලා. මට අරක කරන්න බැරි වුණා, මේක කරන්න බැරි වුණා කියලා දැන් අඬනවා. කඳුළු තියෙන්නේ ජනතාවට. කඳුළු තියෙන්නේ මැරුණු මාධ්‍යවේදීන්ට. හිරේට ගිය අයට. ඒ කඳුළු අයින් කරන්න පුළුවන් මේ රජ පවුල පරද්දලා විධායක ජනාධිපති ක‍්‍රමය අවසන් කරලා පමණයි.
එදා ඔවුන් චෝදනා කළා මට රටේ නායකත්වය දෙන්න මේ ඔක්කොම නිදහසේ වේදිකාව තුළට එකතු වෙනවා කියලා. දැන් මට ජනාධිපති තරෙඟට එන්න කියන්නේ ආණ්ඩුව. වෙන කවුරුවත් කියලා නැහැ.
අපි නිදහසේ වේදිකාව ආරම්භ කරද්දි එදා වේදිකාවේ හිටියා වික‍්‍රමබාහු කරුණාරත්න. එතුමා අමාරු කාලයක ඇවිත් අපිට එකතු වුණා. අපි ඒක අගය කරනවා. එතුමා අද ජනාධිපති අපේක්ෂකයෙක්. අපි සමඟ දිගටම රැඳී සිටි සිරිතුංග ජයසූරිය මැතිතුමා නිර්භීත පුද්ගලයෙක්. එතුමා භය නැතුව කතා කළා. භය නැතුව ඉදිරියට ගියා. එතුමාත් ජනාධිපති අපේක්ෂකයෙක්. මම ඒ දෙන්නටම සුභ ප‍්‍රාර්ථනා කරනවා. මං හිතන්නේ අපි හැමදෙනාම ඔවුන්ට සුභ ප‍්‍රාර්ථනා කරනවා. සමහර අය සහයෝගය දෙයි, සමහරු නොදෙයි. ඒත් අපිට තියෙන්නේ ශිෂ්ට සම්පන්න දේශපාලනයක්. අපි එක එක දේශපාලන පක්ෂවලට ඡන්දය දුන්නත් අපිට පුළුවන් නැඟිටලා කියන්න මේ ගොල්ලෝ හරි, මේ ගොල්ලන්ට සුභ ප‍්‍රාර්ථනා කරන්න කියලා. අපිට ඕන පිරිසිදු දේශපාලනයක්. වික‍්‍රමබාහු කරුණාරත්න, සිරිතුංග ජයසූරිය කියන්නෙ මේ රටේ දේශපාලනයේ ඉන්න ඕන අය. ඒ අය ප‍්‍රජාතන්ත‍්‍රවාදයට ශක්තියක්. ඒ අය නිර්භීතයි. යහපාලනය පෝෂණය කරන පුද්ගලයන්.
අපි තීරණය කරලා පක්ෂ කිහිපයක් එකතු වෙලා එක්සත් ජාතික පෙරමුණ ඇති කළා. අපි නිදහසේ වේදිකාවේ මූලධර්ම පහ පිළිගත්තා. ඒත් ඒවා ක‍්‍රියාත්මක කරන්න නම් විධායක ජනාධිපති ක‍්‍රමය නැති කරන්න ඕන. මම විධායක ජනාධිපති ක‍්‍රමය නිර්මාණය කරන්න උදව් දුන් පුද්ගලයෙක්. අපි හිතුවෙ නැහැ මේක රජකම දක්වා යයි කියලා. මෙම ජනාධිපති ක‍්‍රමය නැති කරලා අලූතෙන් මේක පටන් ගන්න ඕන. ඊට පස්සේ මේ මූලධර්ම පහ අපිට ක‍්‍රියාත්මක කරන්න පුළුවන්.
අපි හිතුවා හැම කෙනාටම පිළිගන්න පුළුවන් අපේක්ෂකයෙක් ඉන්නවා නම් උදව් කරන්න. සරත් ෆොන්සේකා ඉදිරියට ආවා. මේ කාරණා ඔක්කොම එතුමා පිළිගත්තා. වෙනම පක්ෂයක් වශයෙන් ජනතා විමුක්ති පෙරමුණත් ඔහුට සහාය දෙනවා. අපි හිතුවා සරත් ෆොන්සේකාගේ ඒ අපේක්ෂාවට උදව් කරලා එතුමාගේ ජයග‍්‍රහණයෙන් ප‍්‍රජාතන්ත‍්‍රවාදය තහවුරු කරන්න වැඩ කටයුතු කරමු කියලා. අන්න එතනට අද අපි ඇවිල්ලා තියෙන්නෙ.
ඒත් අපි මේ නිදහසේ වේදිකාව පටන් ගත්තේ නැත්නම්, කෑගැහුවේ නැත්නම් අද මහින්ද රාජපක්ෂ ඡන්දෙට එන්නේ නැහැ කියන එක අපිට සහතිකයි.
Back to samabima....
Back to Platform...
View PDF ...
No comments:
Post a Comment